Verkefnið var unnið í nánu samstarfi við HS Veitur og Almannavarnir.

Trukkaveitan eða Tankveitan eins og hún hefur líka verið nefnd flutti heitt vatn á tankbílum frá Hafnarfirði til Reykjanesbæjar og Voga. Vatnið var sett inn á dreifikerfið á þeim stöðum sem rafdreifikerfið var viðkvæmt. Tilgangurinn var að verja kerfin og halda varma í því, viðhalda örlitlu rennsli og þrýstingi til að draga úr líkum á skemmdum þegar vatni er aftur hleypt á.

Í morgun var búið að fara alls 134 ferðir á milli Hafnarfjarðar og Suðurnesja með um 1800 tonn af heitu vatni og voru tíu trukkar notaðir við verkið.

„Eftir að ljóst var að íbúar á Suðurnesjum stæðu frammi fyrir heitavatnsleysi bjuggum við til Trukkaveituna eftir að hafa lagt höfuðið í bleyti um hvernig við gætum aðstoðað á skilvirkan hátt. Um kvöldmatarleytið í gær vorum við afhenda um 25-30 l á sekúndu sem er á pari við það sem Hvolsvöllur er að nota. Vatnið var um 70 gráður en það var um 80 gráður í Hafnarfirði sem sýnir að Trukkaveitan virkar betur en við þorðum að vona. Trukkaveitan er dæmi um nýsköpun og frumkvæði sem við í Veitum viljum temja okkur. Ég er þakklát öllu starfsfólkinu okkar sem hefur unnið dag og nótt við að aðstoða HS Veitur við að koma heitu vatni til Suðurnesja í þessu stóra verkefni sem við stöndum frammi fyrir,“ segir Hrefna Hallgrímsdóttir, forstöðumaður hitaveitu Veitna.

Veitur hafa stutt dyggilega við aðgerðir HS Veitna á Suðurnesjum og við munum halda því áfram, m.a kom Rafveitan upp varaaflsvélum á viðkvæmum stöðum í samráði við Almannavarnir og HS Veitur.