Stefna

Sjálfbærnistefna

Sjálfbærnistefnan er skuldbinding Veitna um að sýna umhverfi, auðlindum og samfélagi virðingu. Í því skyni eru viðhafðir vandaðir stjórnarhættir, sem miða að stöðugum umbótum. Stefnan er grundvöllur farsælla ákvarðana og góðs samstarfs sem byggist á gegnsæi í upplýsingagjöf. Veitur kallar eftir skoðunum hagsmunaaðila á því hvort starfsemi samstæðunnar sé sjálfbær og bregst við ábendingum með ábyrgum hætti. Sjálfbærnistefnan byggir á gildum Veitna – frumkvæði, hagsýni, framsýni og heiðarleika – og er sett fram til samræmis við leiðarljós eigendastefnu fyrirtækisins.

Sjálfbærnistefnan er sett fram með eftirfarandi áherslum sem fylgt er eftir með skilgreiningu þýðingarmikilla sjálfbærniþátta. Móðurfélagið veitir faglegan stuðning og mótar sjálfbærnimarkmið fyrir samstæðuna í heild.

Loftslag og loftslagsáhætta

Veitur nýta bestu viðmið við mælingu kolefnisspors síns og stefna á vottað nettó-núll kolefnisspor eigin starfsemi árið 2030 og einnig vegna aðfangakeðju starfseminnar árið 2040. Þannig minnkar kolefnisspor samfélagsins alls. Jafnframt er viðnámsþróttur samfélagsins efldur með aðlögun þjónustukerfanna að loftslagsbreytingum.

Veitur vinna eftir eigin markmiðum og stýra sinni loftslagstengdu áhættu.

Ábyrg auðlindanýting

Veitum er falin mikil ábyrgð á þeim auðlindum sem þær nýta. Ábyrg nýting felst í því að komandi kynslóðir búi við samsvarandi tækifæri og núlifandi kynslóðir til að nýta auðlindirnar og að unnt sé að staðfesta að þannig sé að verki staðið. Því hámarka Veitur líftíma auðlinda, lágmarka umhverfisáhrif og standa með því vörð um líffræðilega fjölbreytni og vistkerfi. Veitur skuldbinda sig til þess að leita farsælla lausna þar sem auðlindanýting í almannaþágu er vegin og metin í samhengi við aðra hagsmuni. Veitur munu verja auðlindirnar fyrir hættum og ágengni, vegna þeirrar ábyrgðar sem fyrirtækinu er falin.

Viðskiptavinir

Veitur styðja vaxandi samfélag, heimili og atvinnulíf með nýsköpun í orku- og veitustarfsemi. Fyrirtækið vinnur með eigendum Orkuveitunnar, öðrum sveitarfélögum, heimilum og atvinnulífinu í átt að sjálfbærri framtíð með gagnkvæman ávinning að leiðarljósi. Áreiðanlegur aðgangur að snjallri grunnþjónustu Veitna á sanngjörnu verði er á meðal þess sem gerir Veitur að aflvaka sjálfbærrar framtíðar með ánægju viðskiptavina í fremstu röð.

Losun og hringrás

Veitur eru brautryðjandi í hringrás í orku- og veitustarfsemi. Veitur draga úr losun mengandi efna eins og kostur er og leggja áherslu á rannsóknir og þróun til að geta nýtt bestu mögulegu lausnir þar sem hringrásarhugsun er í forgangi.

Góður samfélagsþegn

Veitur eru stórt fyrirtæki á landsvísu sem býr að þekkingu, reynslu og sögu. Veitur skapa þekkingu og miðla henni. Veitur beita áhrifum í virðiskeðjunni þar sem hvatt er til ábyrgrar umgengni við umhverfið, ábyrgrar neysluhegðunar og jákvæðra áhrifa á mannréttindi. Veitur eru leiðandi í nýsköpun og eftirsóttar til samstarfs.

Ábyrgir starfshættir

Sem stórt og áberandi fyrirtæki í almannaþjónustu og almannaeigu skiptir máli að Veitur séu til fyrirmyndar, m.a. um stjórnarhætti. Veitur stuðla að menningu þar sem virðing ríkir í samskiptum milli starfsfólks á öruggum og inngildandi vinnustað.

Veitur hlíta öllum ákvæðum laga og reglugerða sem um starfsemina gilda.

Þýðingarmiklir sjálfbærniþættir

Veitur hafa skilgreint eftirfarandi sjálfbærniþætti sem þýðingarmikla með hliðsjón af þeim meginreglum sem fram koma í sjálfbærnistefnunni. Veitur setja sér markmið um þessa þætti og skilgreina ábyrgð:

Loftslag og loftslagsáhætta:

• Losun og losunarkræfni gróðurhúsalofttegunda eftir umfangi 1, 2 og 3 og binding gróðurhúsalofttegunda
• Viðnámsþol gagnvart loftslagsbreytingum

Ábyrg auðlindanýting:

• Líffræðilegur fjölbreytileiki og vistkerfi á eignarlandi og athafnasvæðum
• Nýting á háhitasvæðum
• Nýting á lághitasvæðum
• Vernd neysluvatns

Viðskiptavinir:

• Afhendingaröryggi veitukerfa
• Verð á sérleyfisþjónustu
• Ánægja viðskiptavina
• Sjálfbær varmaöflun

Losun og hringrás:

• Losun frárennslis frá hreinsistöðvum og um yfirföll
• Úrgangur, þ.á.m. fráveituúrgangur

Góður samfélagsþegn:

• Miðlun þekkingar
• Veittir og mótteknir styrkir til vísinda og þróunar
• Sjálfbær innkaup
• Afstaða almennings til vörumerkja Veitna

Ábyrgir starfshættir:

• Kynbundinn launamunur
• Helgun starfsfólks
• Vinnuslysatíðni
• Gegnsæ skýrslugjöf samkvæmt viðurkenndum viðmiðum

[Stefna samþykkt á stjórnarfundi 20.11.2025]