Til að tryggja betur vatnsvernd munu Veitur girða að fullu af brunnsvæði kringum vatnstökuholur við Myllulæk á næstu mánuðum. Brunnsvæði er það svæði sem er næst vatnstökuholunum okkar og nýtur algjörrar verndar. Þetta er gert að kröfu Heilbrigðiseftirlits Reykjavíkur og í samræmi við reglugerðir um vatnsvernd og vatnsverndarsamþykkt höfuðborgarsvæðisins. Þetta mun verða til þess að færa þarf til tvo útivistarstíga innan svæðisins, hluta göngu- og hjólastígs sem kallaður er Ríkishringur og hluta gönguskíðabrautar.

Eftir að brunnsvæði Myllulækjar hefur verið girt af að fullu hefur það svæði sem er algjörlega friðað vegna vatnsverndar stækkað um einungis 1% af heildar flatarmáli Heiðmerkur.

Girðing brunnsvæðis Myllulækjar mun ekki takmarka aðgengi að útivistarstígum en er mikilvægt skref í verndun okkar einstaka neysluvatns. 

• Breytingin kallar á hliðrun Ríkishringsins og gönguskíðabrautarinnar til suðvesturs - á þessu svæði er mikil gróðursæld og einstakt útsýni 

• Við sjáum fram á Ríkishringurinn lengist um u.þ.b. 900 m 

• Ríkishringnum verður ekki lokað á meðan framkvæmdir standa yfir 

• Við munum leita samráðs við hagaðila á næstu vikum um rýni að drögum að nýrri legu stígsins sem sjá má á eftirfarandi mynd: 

Hvers vegna?

• Verið er að girða af brunnsvæðið til að tryggja íbúum höfuðborgarsvæðisins hreint vatn til framtíðar
• Reglugerð um varnir gegn mengun vatns (796/1999) og Vatnsverndarsamþykkt höfuðborgarsvæðisins (555/2015) kveða á um að brunnsvæði skuli vera algjörlega friðað fyrir óviðkomandi umferð og framkvæmdum öðrum en þeim sem nauðsynlegar eru vegna vatnsveitunnar. Til að framfylgja þessu er nauðsynlegt að færa stíga út fyrir brunnsvæðið og girða það af
• Heilbrigðiseftirlit Reykjavíkur hefur í samræmi við þessi ákvæði farið fram á að Veitur ljúki við að girða brunnsvæðið af
• Ákvörðun um að girða af brunnsvæðið er studd af staðbundnum jarðfræðilegum aðstæðum. Myllulækur stendur á grágrýtisflákum og liggur sprungusveimur gegnum svæðið. Borholur draga til sín vatn úr sprungusveiminum. Svæðið sem girt verður af er sprungið og því metið sem viðkvæmt fyrir mengun af yfirborði

Hér má sjá hluta svæðisins þar sem áætlað er að Ríkisihringurinn muni liggja