Mikill áhugi var á göngunni sem bar yfirskriftina "Frá skítalækjum til fráveitu og lýðheilsu," en alls tóku yfir 130 fróðleiksfúsir göngugarpar þátt í henni.

Í göngunni rak Guðjón Friðriksson sagnfræðingur, skólpsögu miðborgarinnar síðustu 100 árin. Gangan hófst við Landakotsspítala en það voru einmitt nunnurnar í Landakoti sem létu fyrst leggja skólplögn ofan af hæðinni niður Ægisgötuna og í sjó fram árið 1902.

Fjallað var um þann tíma þegar skólp rann í opnum rennum eða jafnvel eftir götunum sjálfum og tildrög og sögu þeirra miklu ræsa sem leystu skítalækina af hólmi og stórbættu lýðheilsu.

Göngunni lauk í Ráðhúsi Reykjavíkur þar sem boðið var upp á heitt kakó og veitingar og gestum gafst kostur á að skoða bók Guðjóns CLOACINA - Saga fráveitu. Bókin kom út á vegum Veitna árið 2021 og er öllum aðgengileg á vefnum hér.

Hér má hlusta á viðtal við Guðjón í Samfélaginu á Rás 1 sem tekið var í tilefni göngunnar.

Gangan var haldin í tilefni af alþjóðlegum klósettdegi Sameinuðu þjóðanna 19. nóvemer en þá er leitast við að beina sjónum að mikilvægi góðrar fráveitu fyrir samfélag, umhverfi og heilsu fólks